മോഹൻലാൽ-പൃഥ്വിരാജ് ചിത്രം മലയാള സിനിമയുടെ സകല റെക്കോർഡുകളും തിരുത്തിക്കുറിച്ച് മുന്നേറുകയാണ്. മാർച്ച് 27 ന് റിലീസ് ചെയ്ത സിനിമ നിലവിൽ ആഗോളതലത്തിൽ 250 കോടിയിലധികം രൂപ നേടി കഴിഞ്ഞു. ഇന്ത്യയിലാകെ വൈഡ് റിലീസ് ചെയ്‌തെ സിനിമയുടെ മറ്റ് സംസ്ഥാനങ്ങളിലെ കളക്ഷൻ റിപ്പോർട്ടാണ് ഇപ്പോൾ പുറത്തുവരുന്നത്.
കേരളത്തിൽ നിന്ന് 83 കോടിയിലധികം രൂപയാണ് സിനിമ നേടിയിരിക്കുന്നത്. കേരളത്തിന് ശേഷം എമ്പുരാന് ഏറ്റവുമധികം കളക്ഷൻ ലഭിക്കുന്ന ഇന്ത്യൻ സംസ്ഥാനം കർണാടകയാണ്. 12.32 കോടിയാണ് കർണാടകയിൽ നിന്നും സിനിമ ഇതുവരെ നേടിയിട്ടുള്ളത് എന്ന് സാക്നിൽക്ക് റിപ്പോർട്ട് ചെയ്യുന്നു. കെജിഎഫും സലാറും നിർമിച്ച ഹൊംബാലെ ഫിലിംസാണ് ചിത്രം കർണാടകയിൽ വിതരണം ചെയ്തത്.
തമിഴ്‌നാട്ടിൽ നിന്നാകട്ടെ സിനിമ ഇതുവരെ നേടിയിരിക്കുന്നത് 9.4 കോടിയാണ്. സംസ്ഥാനത്തെ എമ്പുരാന്റെ കളക്ഷനിൽ വലിയ ഇടിവ് സംഭവിക്കുന്നുമുണ്ട്. ആന്ധ്രാപ്രദേശ്, തെലുങ്കാന സംസ്ഥാനങ്ങളിൽ നിന്ന് 4.17 കോടിയാണ് സിനിമ ഇതുവരെ നേടിയിട്ടുള്ളത് എന്നും സാക്നിൽക്ക് റിപ്പോർട്ട് ചെയ്യുന്നു.
അതേസമയം ഒരു മൂന്നാം ഭാഗത്തിന്റെ സാധ്യതകൾ ബാക്കിവെച്ചാണ് സിനിമ അവസാനിക്കുന്നത്. ഈ വിവാദങ്ങൾക്കിടെ ഒരു മൂന്നാം ഭാഗമുണ്ടാകുമോ എന്ന സംശയം ഉയർന്നിരുന്നുവെങ്കിലും ചിത്രം ഉണ്ടാകുമെന്ന നിർമാതാവ് ആന്റണി പെരുമ്പാവൂരിന്റെ ഉറപ്പ് വന്നതോടെ ഈ ചർച്ചകൾ അവസാനിക്കുകയും ചെയ്തു. സിനിമയുടെ പേര് 'അസ്രയേല്‍' എന്നായിരിക്കും എന്ന സൂചനകൾ സംഗീത സംവിധായകൻ ദീപക് ദേവും നൽകിയിട്ടുണ്ട്.
Content Highlights: Empuraan other states collection report